Ամեն տարի անցկացնում ենք առնվազն երկու ժամանակավոր ցուցահանդես: Այս տարի դրանցից մեկը նվիրված կլինի առանձին ընտանիքների պատմությանը, որոնք դարձել են Հայոց ցեղասպանության զոհեր կամ վերապրել են այդ ողբերգությունը: Այդ մասին NEWS.am-ի թղթակցի հետ զրույցում հայտարարել է Հայոց ցեղասպանության թանգարան ինստիտուտի տնօրեն Հարություն Մարությանը:
Նա պարզաբանել է, որ սովորաբար ցուցահանդեսները լինում են ընդհանուր բնույթի, իսկ այս անգամ որոշում է կայացվել անդրադառնալ տվյալ թեմային՝ ներակայացնելով ընտանիքների ճակատագրերը:
Մարությանը մանրամասնել է, որ երկրորդ ժամանակավոր ցուցահանդեսը կկայանա աշնանը:
«Օսմանյան կայսրությունում եւ Արեւելյան Հայաստանում գործել են բազմաթիվ կրթական հաստատություններ: Մեզ մոտ պահպանվել են ավարտական ատեստատներ այդ հաստատություններից: Ցուցահանդեսը կունենա կրթական ուղղվածություն»,-հավելել է թանգարանի տնօրենը:
Նա նշել է, որ վերջերս կայացել է Հայոց ցեղասպանությունը վերապրածների հուշերի շնորհանդեսը, հրատարակվել է 4 գիրք, այս տարի կհրատարակվի եւս 3-4 գիրք:
«Հուշերը կարեւոր սկզբնաղբյուր են Հայոց ցեղասպանության մասին: Դրանք Ցեղասպանության մասին հասարակ մարդկանց վկայությունն են եւ ապտակ թուրքական հերքմանը: Մարդիկ պատմում են իրենց անձնական ապրումների մասին»,-եզրակացրել է նա:
