Ընթացքի մեջ են Շիրակի մարզի գյուղական բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով պետական աջակցությամբ իրականացվող բնակելի տների կառուցման շինարարական աշխատանքները:
Ինչպես «Արմենպրես»-ը տեղեկացավ մարզպետարանի քաղաքաշինության վարչությունից՝ 2020 թվականին մեկնարկած 26 ընտանիքների բնակարանների կառուցման աշխատանքները ավարտին կհասցվեն ս.թ. նոյեմբեր ամսին: Ընդհանուր առամամբ, Շիրակի մարզում 2021 թվականին քաղաքաշինության ոլորտում իրականացվելու է շուրջ 41 մլն դրամ գումարի կապիտալ ներդրումներ: Այդ գումարի շրջանակում նախատեսվում են մանկապարտեզների, առողջապահական կառույցների և մարզադպրոցի, փողոցաշինության աշխտանքներ: Շիրակի մարզում 2021 թվականի համար նախատեսված բոլոր քաղաքաշիական ծրագրերը կյանքի կկոչվեն:
«Հայաստան» համահայկական հիմնադրամի պատվիրատվությամբ Գյումրի քաղաքի Մուշ-2 թաղամասում ընթանում են բնակելի համալիրի և մանկապարտեզի կառուցման աշխատանքներ: Շահագործման կհանձնվի 40 բնակարան և 46 երեխայի համար նախատեսված մանկապարտեզ: Ծրագրի ավարտը նախատեսված է 2022 թվականին:
Գյումրի քաղաքում մեկնարկել է նաև մասնավոր ներդրումներով բնակարանաշինության ծրագիր: Գարեգին Նժդեհի փողոց, 9/10 հասցեի հողամասում կկառուցվի շուրջ 290 բնակարանով բնակելի համալիր:
2021 թվականին մարզում նախատեսվում է իրականացնել փոքրաքանակ երեխաներով համալրված հանրակրթական դպրոցների մոդուլային շենքերի կառուցման աշխատանքներ՝ Բերդաշեն, Կապս, Արեգնադեմ համայնքներում: Հայաստանի տարածքային զարգացման հիմնադրամի պատվիրատվությամբ մարզում կսկսվի նաև 4 մանկապարտեզի կառուցումը, պատվիրատուն ՀՀ քաղաքաշինական կոմիտեն է: Ասիական զարգացման բանկը, Հայաստանի տարածքային զարգացման հիմնադրամի պատվիրատվությամբ կսկսի Արթիկի թիվ 2 և Ազատանի թիվ 2 դպրոցների կառուցման աշխատանքներ: Հայաստանի տարածքային զարգացման հիմնադրամի պատվիրատվությամբ էլ մարզում կսկսվեն 4 մանկապարտեզների կառուցման աշխատանքներ: «Մոդուլային» տիպի 144 տեղ հզորությամբ մսուր-մանկապարտեզ կկառուցվի Արթիկում: Գյումրի և Արթիկ քաղաքներում իրականացվում են համալիր սոցիալական ծառայության տարածքայրն կենտրոնների կառուցման աշխատանքներ: Ծրագիրը մեկնարկել է 2020 թվականին:
«ՀՀ քաղաքաշինական կոմիտեի պատվիրատվությամբ Գյումրի քաղաքում մեկնարկել են «Արթուր Ալեքսանյանի անվան հունահռոմեական ըմբշամարտի մանկապատանեկան դպրոց» նոր սպորտային համալիրի կառուցման աշխատանքները։ 2021 թվականին իրականացվելու են շուրջ 500,0 մլն դրամի շինարարական աշխատանքներ: Ծրագրի ընդանուր արժեքը կազմում է 4 938, 6 մլն դրամ»,- հավելեց Շիրակի մարզպետարանի քաղաքաշինության վարչության պետ Ալբերտ Մարգարյանը: Տարվա ընթացքում շարունակվում են նաև 2020 թվականին մեկնարկած Գյումրու «Մոր և մանկան ավստրիական հիվանդանոց» ՓԲԸ-ի ծննդատան մասնաշենքի կառուցման աշխատանքները։
