Մուսա լեռան հերոսամարտին նվիրված տոնախմբությունների շրջանակում Հայաստանի պետական ֆիլհարմոնիան և «Մուսա լեռ» հայրենակցական միությունը հանդես կգան մշակութային նախաձեռնություններով:
«Արմենպրես»-ի հաղորդմամբ՝ սեպտեմբերի 16-ին «Առնո Բաբաջանյան» համերգասրահում ելույթ կունենա Հայաստանի պետական ֆիլհարմոնիայի «Ֆոլկ-մոդեռն» ժողովրդական գործիքների նվագախումբը (գեղարվեստական ղեկավար, ՀՀ վաստակավոր արտիստ՝ Լևոն Թևանյան)։ Երեկոյին կցուցադրվի Արա Վահանունու «Մուսա լեռ - 88՝ Վիշապի տարի» ֆիլմը։
Սեպտեմբերի 18-ին Մուսա լեռան հերոսամարտի հուշահամալիրում համերգով հանդես կգան «Ակունք» ազգագրական համույթը և «Կարին» ավանդական երգի-պարի խումբը։
Մուսա լեռան հերոսամարտը Մուսա լեռան շրջակայքի հայկական գյուղերի բնակիչների 53-օրյա ինքնապաշտպանությունն է թուրքական կանոնավոր և անկանոն ուժերի դեմ։ Հայ խաղաղ բնակչության կոտորածները Հայոց ցեղասպանության մաս էին կազմում, սակայն Մուսա լեռան գյուղերի հայ բնակչությունը, կանխազգալով մոտալուտ վտանգը, բարձրանում է Մուսա լեռ և սկսվում է ինքնապաշտպանությունը։ Վերջիվերջո ֆրանսիական և անգլիական նավերը, տեսնելով ինքնապաշտպանվողների «Քրիստոնյաները վտանգի մեջ են» գրությունը, օգնության են գալիս և ինքնապաշտպանվող 4231 հայի տեղափոխում են Եգիպտոս, որտեղ հետագայում շատերը մտնում են Ֆրանսիական հայկական լեգեոնի կազմի մեջ։ Ոգեշնչված և տպավորված այս իրադարձություններով՝ ավստրիացի գրող Ֆրանց Վերֆելը 1933 թ-ին գրում է «Մուսա լեռան քառասուն օրը» ստեղծագործությունը։
