2023 թվականի հունվարի 1-ից Թուրքիայում ուժի մեջ կմտնի կացության 2 տոկոս հարկը։ Այն գանձվելու է քաղաքացիներից հյուրանոցներում, զբոսաշրջային գյուղերում, մոթելներում, պանսիոնատներում, հյուրատներում և այլ կացարաններում գտնվելու համար: Բացի այդ, հարկը կարող է ներառվել տուրիստական գործակալությունների շրջագայություններում։
Հանրակացարաններում, պանսիոնատներում և ճամբարներում ապրող աշակերտներն ու ուսանողները կազատվեն հարկից՝ ասվում է փաստաթղթում։ Բացի այդ, հարկ չեն վճարի Թուրքիայում հավատարմագրված դիվանագիտական ներկայացուցչությունների և միջազգային կազմակերպությունների ներկայացուցիչները, որոնք դիվանագիտական կարգավիճակ ունեն։
Թուրք հյուրանոցատերերի միության աղբյուրը ՏԱՍՍ-ին հայտնել է, որ գրեթե բոլոր հյուրանոցները, հատկապես առողջարանային շրջաններում, պատրաստ են աշխատելու նոր պայմաններում, և դրանում ոչ մի արտառոց բան չկա։
Մինչդեռ Թուրքիայի զբոսաշրջության ոլորտի ներկայացուցիչները նախկինում դեմ են արտահայտվել կացության հարկի ներդրմանը՝ պատճառաբանելով, որ դա կարող է թուլացնել երկրի մրցակցային դիրքը, որը, ի տարբերություն շատերի, նախկինում նման վճարներ չի հավաքել։
