ՀՀ գլխավոր դատախազ Աննա Վարդապետյանը, Պաշպանության նախկին նախարար, ԱԺ «Հայաստան» խմբակցության ղեկավար Սեյրան Օհանյանի նկատմամբ քրեական հետապնդում հարուցելուն ԱԺ-ի կողմից համաձայնություն տալու միջնորդության ներկայացման ժամանակ ընդգծեց, որ զորամասի տարածքն օտարելու համար պետական շահի տեսանկյունից որևէ բացատրություն չի հնչել:
«Արմենպրես»-ի հաղորդմամբ՝ միջնորդագրի ներկայացումից հետո գլխավոր դատախազին հարց տվեց ԱԺ նախագահ Ալեն Սիմոնյանը. «Որքանով ես հասկացա՝ զորամասի տարածքը սեփականաշնորհվել է, հանձնվել է երրորդ անձի և դրանից հետո գրավադրվել է: Կա՞ որևիցե բացատրություն, թե ինչո՞ւ են զորամասի տարածքը հանձնել երրորդ մեկին, դրանից հետո գրավադրել բանկում»:
Վարդապետյանն ասաց՝ պետական շահի տեսանկյունից բացատրություն չի հնչել: «Հիմնական բացատրությունը, որ, որպես իրավաբան ինձ հասկանալի է այդ սխեմայի մեջ, կայանում է նրանում, որ երրորդ անձի անունով գույքը գրանցելը ի սկզբանե նպատակ է ունեցել թաքցնել իրական գնորդին, այսինքն՝ ցույց չտալ, թե ում է օտարվում տարածքը: Հետագայում, իհարկե, բանկում գրավադրումը և շահառուին վերհանելը, ով բանկից ստացել է գումար, մեզ հնարավորություն է տվել բացահայտել իրական սեփականատիրոջը: Թույլ կտամ ինձ ասել, որ պետական շահի տեսանկյունից որևէ բացատրություն չի հնչել»,-ասաց Վարդապետյանը:
Դատախազի խոսքով՝ հնչած բացատրությունները եղել են խիստ անորոշ, հատկապես, երբ տվյալ տարածքները չօտարելու՝ Հողային օրենսգրքի ուղիղ պահանջ կա: Փորձեր եղել են հիմնավորելու, որ ծախսատար է եղել, այդքան մեծ տարածք անհրաժեշտ չի եղել, այդքան զինվորական միավորներ չեն եղել այդ զորամասերում տեղավորելու համար: Սակայն, Վարդապետյանի խոսքով, նախաքննությանը չեն ներկայացվել փաստաթղթային հիմնավորումներ:
ՀՀ գլխավոր դատախազը ԱԺ-ին է ներկայացրել 3 միջնորդագիր: Այժմ խորհրդարանը քննարկում է երկրորդ միջնորդագիրը:
