Համայնքային ոստիկանությունը կվերածվի բազմաֆունկցիոնալ ծառայության, որը կնպաստի համայնքամետ գործունեության ամրապնդմանը"
Ներքին գործերի նախարարությունը շարունակում է հետևողականորեն ապահովել ոստիկանության բարեփոխումների շրջանակում քննարկված և ոստիկանության բարեփոխումները համակարգող խորհրդում նախանշված լուծումների իրականացումը։
Համայնքային ոստիկանության վերաիմաստավորման շրջանակներում ծառայությանը բազմաֆունկցիոնալ գործիքակազմի տրամադրման նպատակով մշակվել և e-draft.am կայքում տեղադրվել են մի շարք օրենքներում փոփոխություններ և լրացումներ կատարելու մասին օրենքների նախագծերը։
ՀՀ ներքին գործերի նախարարությունն առաջարկում է մարտի 30-ից ապրիլի 15-ը նախագծերի վերաբերյալ դիտողություններն ու առաջարկությունները թողնել e-draft.am կայքում:
Նախագծերի ընդունման արդյունքում համայնքային ոստիկանությունը կվերածվի բազմաֆունկցիոնալ ծառայության, որը կնպաստի համայնքամետ գործունեության ամրապնդմանը, նաև կստեղծվեն անհրաժեշտ նախադրյալներ ոստիկանության համակարգում չորս հենասյունային ուղղությունների զարգացման տեսլականի իրացման համար՝ ի դեմս քրեական ոստիկանության, պարեկային ծառայության, ոստիկանական գվարդիայի և համայնքային ոստիկանության։
