Բելգիայում հիմնված «Թուրքական տրիբունալ» կազմակերպության հրապարակած նոր զեկույցի համաձայն՝ թուրքական իշխանություններն ավելի ու ավելի հաճախ են սկսել առևանգել երկրի կառավարության հակառակորդներին՝ ինչպես Թուրքիայի ներսում, այնպես էլ երկրի սահմաններից դուրս և հաճախ նրանց, գաղտնի վայրեր տեղափոխելով, տանջանքների են ենթարկում: Այս մասին գրում է alarabiya.net պարբերականը:
Թուրքիայում մարդու իրավունքների խախտումներն ավելի ու ավելի են հաճախակիացել այն բանից հետո, երբ 2016 թվականին երկրում չհաջողված հեղաշրջման փորձ եղավ: Դրանից հետո սկսեցին ավելի հաճախ լուրեր տարածվել ձերբակալությունների, ակադեմիական և պետական պաշտոններից ազատելու և մարդկանց անհետացումների մասին:
Բելգիայում տեղակայված «Թուրքական տրիբունալ» կազմակերպության զեկույցում ասվում է, որ չնայած Թուրքիան հերքում է պետության կապը ներքին առևանգումների հետ, «կան բավականին մեծ ապացույցներ, որ առևանգումներն ու անհետացումները կազմակերպվել են Թուրքիայի ազգային հետախուզական ծառայության կողմից»:
Մասամբ հիմնվելով Անկարայի փաստաբանների միության զեկույցի վրա՝ վերլուծությունը կենտրոնացել է 2016 թվականի հուլիսի 15-ին Էրդողանի կառավարությունը տապալելու հեղաշրջման ձախողված փորձից հետո տեղի ունեցած առևանգումների վրա, քանի որ այդ ժամանակից ի վեր «Թուրքիայի քաղաքացիների առևանգման միտումը կտրուկ աճում է»:
Նոր զեկույցում, որը հրապարակվել է այս ամիս, նշված է 25 ներքին առևանգում, որոնք «հաստատվել են տեսաձայնագրություններով, վկաների ցուցմունքներով, ՀԿ-ների ուսումնասիրություններով և այլ համապատասխան աղբյուրներով»:
Գրում է՝ Tert.am-ը:
