Ռուսաստանի Դաշնության նախագահի մամուլի քարտուղար Դմիտրի Պեսկովը հայտարարել է, որ ինքն անձամբ տեղեկություն չի ունեցել Բելառուսի Նախագահ Ալեքսանդր Լուկաշենկոյի այսօր տեղի ունեցած երդմնակալության մասին: Այս մասին գրում է «ՌԻԱ Նովոստի» գործակալությունը:
«Ես անձամբ տեղեկություն չեմ ունեցել այդ մասին»,-ասել է Պեսկովը լրագրողներին` պատասխանելով հարցին այն մասին, թե արդյոք Կրեմլում գիտեին, որ Բելառուսի նախագահի երդմնակալությունը տեղի է ունենալու այսօր:
Մեկնաբանելով հարցն այն մասին, թե արդյոք ՌԴ նախագահ Վլադիմիր Պուտինը հրավիրված է եղել Լուկաշենկոյի երդմնակալության արարողությանը, Պեսկովը նշել է, որ ընթացակարգը չի նախատեսում օտարերկրյա առաջնորդների ներկայությունը երդմնակալության արարողությանը:
Ինչպես ավելի վաղ տեղեկացրել էր Tert.am-ը, Ալեքսանդր Լուկաշենկոն ստանձնել է Բելառուսի նախագահի պաշտոնը: Սահմանադրության վրա աջ ձեռքը դնելով՝ Լուկաշենկոն բելառուսերեն երդում է տվել, որից հետո ԿԸՀ-ի ղեկավար Լիդիա Երմոշինան նրան հանձնել է համապատասխան փաստաթուղթը:
Նշվում է, որ արարողության մասին նախապես ոչինչ չի հայտարարվել, ուստի՝ բազմաթիվ լրատվամիջոցներ այն «գաղտնի» են որակել:
Գրում է՝ Tert.am-ը:
