ՆԱՏՕ-ի գլխավոր քարտուղար Յենս Ստոլտենբերգը հայտարարել է Միջերկրական ծովի արևելյան տարածաշրջանում առկա իրավիճակի շուրջ Թուրքիայի և Հունաստանի միջև ընթացող երկխոսության առաջընթացի մասին: Այս մասին գրում է «Անադոլու» գործակալությունը:
Ստոլտենբերգը հիշեցրել է, որ երկու երկրների ռազմական պատվիրակություններն արդեն մի քանի հանդիպում են անցկացրել Բրյուսելում տեղակայված ՆԱՏՕ-ի շտաբ-բնակարանում, որտեղ քննարկել են «անջատման մեթոդները», ինչպես նաև օդում և ծովում անցանկալի միջադեպերը կանխելու ուղիները:
«Հանդիպումները շարունակվում են: Զգալի առաջընթաց է նկատվում»,-հայտարարել է Ստոլտենբերգը:
Գլխավոր քարտուղարն ընդգծել է, որ խոսքը ռազմական պատվիրակությունների մակարդակով տեխնիկական բանակցությունների մասին է, որոնք լրացնում են տարածաշրջանում առկա տարաձայնությունները լուծելու ուղղությամբ Գերմանիայի դիվանագիտական ջանքերը:
Ստոլտենբերգը խոստացել է նաև, որ ՆԱՏՕ-ն կշարունակի սերտ կապեր պահպանել Թուրքիայի և Հունաստանի ղեկավարների հետ:
Թուրքիայի հարաբերությունները Միջերկրական ծովի արևելյան հատվածի պետությունների հետ սրվել են Անկարայի կողմից այս երկրների ջրային տարածքներում հորատման աշխատանքներ սկսելուց հետո:
Գրում է՝ Tert.am-ը: