Բելառուսի արտգործնախարարությունից հայտարարել են, որ Արևմուտքի որոշ երկրների՝ նախագահ Ալեքսանդր Լուկաշենկոյի օրինական լինելը կասկածի տակ դնելու ձգտումը չի արտահայտում միջազգային հանրության մեծամասնության կարծիքը, գրում է eadaily.com կայքը:
Միևնույն ժամանակ արտգործնախարարությունից ընդգծել են, որ այլ երկրների «ներքին գործերին միջամտելու արգելքը միջազգային իրավունքի հիմնաքարերից մեկն է, որն ամրագրված է ՄԱԿ-ի կանոնադրության 2-րդ հոդվածում»:
«Բելառուս ժողովուրդը չի սպասում ինքնակոչ «օրինականացնողների» կողմից իր իշխանության «օրինականացմանը»: Այս հարցը հորինված ու արհեստական է: Արևմուտքի որոշ երկրների՝ պետության ղեկավարի օրինականությունը կասկածի տակ դնելու ձգտումը որևէ կերպ չի արտահայտում միջազգային հանրության մեծամասնության կարծիքը»,- շեշտել է գերատեսչությունը:
Բացի այդ, նախարարությունից ընդգծել են, որ «հատուկ ուշադրության է արժանի Ուկրաինայի վարքագիծը, քանի որ այնտեղ արդեն չեն էլ փորձում թաքցնել, որ չեն կարողանում որոշում կայացնել իրենց արտաքին քաղաքական հարցերի շուրջ և չեն դադարում «առաջադեմ» հայտարարություններ անել հենց Բելառուսի ներքին քաղաքական իրավիճակի շուրջ:
Միևնույն ժամանակ ևս մեկ անգամ ընգծվել է, որ «Բելառուսն այլ պետությունների ներքին քաղաքական հարցերին խառնվելու մտադրություն երբևէ չի ունեցել և չունի»:
Հիշեցնենք, որ Ալեքսանդր Լուկաշենկոն սեպտեմբերի 23-ին ստանձնել է Բելառուսի նախագահի պաշտոնը: Սահմանադրության վրա աջ ձեռքը դնելով՝ Լուկաշենկոն բելառուսերեն երդում է տվել, որից հետո ԿԸՀ-ի ղեկավար Լիդիա Երմոշինան նրան հանձնել է համապատասխան փաստաթուղթը:
Արարողությունը տեղի է ունեցել Անկախության պալատում։ Միջոցառմանը ներկա է եղել մի քանի հարյուր մարդ՝ պաշտոնյաներ, խորհրդարանականներ, լրատվամիջոցների ղեկավարներ, մշակույթի և սպորտի գործիչներ և այլք։
Բելառուսի ընդդիմությունը Լուկաշենկոյի երդմնակալությունից հետո մտադիր է բողոքի անժամկետ ակցիա անցկացնել, ինչի մասին հայտնել է բելառուսական ընդդիմության համակարգող խորհրդի նախագահության անդամ Պավել Լատուշկոն:
«Մենք երբեք չենք համաձայնի ընտրակեղծիքների հետ և պահանջում ենք նոր ընտրություններ։ Կոչ ենք անում բոլորին սկսել անհնազանդության անժամկետ ակցիա»,-Telegram-ում գրել է Լատուշկոն:
Բելառուսում նախագահական ընտրությունները կայացել են օգոստոսի 9-ին․ Լուկաշենկոն հավաքել է ձայների 80,1 տոկոսը։ Ընդդիմությունն ու Եվրամիությունը չեն ընդունել քվեարկության արդյունքները։
Երկրում բողոքի ակցիաները չեն դադարում օգոստոսի 10-ից ի վեր: Երկրի քաղաքացիներն իրենց դժգոհությունն են հայտնում օգոստոսի 9-ին կայացած նախագահական ընտրությունների արդյունքներից, որոնց համաձայն հաղթող է ճանաչվել Լուկաշենկոն: Ցույցերի առաջին օրերին հազարավոր մարդիկ էին ձերբակալվել, հարյուրավորները՝ վիրավորվել:
Գրում է՝ Tert.am -ը: