Մեծ Բրիտանիայի իշխանությունները ուշադիր կուսումնասիրեն Շոտլանդիայի ղեկավար Նիկոլա Սթերջենի ներկայացրած անկախության երկրորդ հանրաքվեի անցկացման առաջարկը: Այս մասին հայտնել է Մեծ Բրիտանիայի վարչապետի ներկայացուցիչը, փոխանցում է Telegraph-ը: Շոտլանդիայում մտադիր են անկախության հանրաքվե անցկացնել 2023 թվականի հոկտեմբերի 19-ին:
Ջոնսոնի ներկայացուցիչն ասել է, որ բրիտանական իշխանությունները պատրաստ են համատեղ աշխատել Շոտլանդիայի կառավարության հետ հարցերի շուրջ, որոնք իսկապես կարևոր են ժողովրդի համար:
Ելույթ ունենալով Շոտլանդիայի խորհրդարանում՝ Ստերջենն ասել է, որ կառավարության ընտրած ուղին հեշտ չի լինելու, սակայն պետք է անցնել այն՝ հանուն սեփական ապագան ընտրելու հնարավորության:
Հանրաքվեին ծրագրվում է առաջադրել նույն հարցը, ինչ 2014-ին. «Պե՞տք է արդյոք, որ Շոտլանդիան դառնա անկախ երկիր»:
Ստերջենը խոստացել է ձեռնարկել բոլոր անհրաժեշտ իրավական միջոցառումները, որպեսզի քվեարկությունը տեղի ունենա նույնիսկ այն դեպքում, եթե բրիտանական կառավարություն փորձի այն արգելափակել:
