Ռուսաստանին թշնամի հայտարարելու ՆԱՏՕ-ի որոշումը տանում է լարվածության սրման և Եվրոպայում անվտանգության ապակայունացման, հակասում Ռուսաստան-ՆԱՏՕ հիմնարար ակտին, ասել է ՌԴ Անվտանգության խորհրդի քարտուղար Նիկոլայ Պատրուշևը։
«Ռուսաստանը, որը պաշտպանում է իր ազգային շահերն ու ինքնիշխանությունը, ԱՄՆ-ի և նրա դաշնակիցների կողմից թշնամի է հայտարարվել, ինչն արտացոլված է դոկտրինալ փաստաթղթերում, այդ թվում՝ Մադրիդում ՆԱՏՕ-ի գագաթնաժողովում ընդունված փաստաթղթերում», – ասել է Պատրուշևը՝ երեքշաբթի Խաբարովսկում ելույթ ունենալով Հեռավոր Արևելքի ՌԴ ազգային անվտանգության ապահովման հարցերով հանդիպման ժամանակ, փոխանցում է RIA Novosti-ն:
Նա հիշեցրել է, որ «Միացյալ Նահանգները և նրա արբանյակները հրաժարվել են Ռուսաստանի հետ ռազմավարական կայունության ոլորտում կառուցողական երկխոսությունից և լիովին անտեսել անվտանգության երաշխիքների վերաբերյալ Մոսկվայի պահանջները»։
Նա հայտնել է, որ որքան էլ Արևմուտքը զենք մատակարարի Ուկրաինային, միևնույն է, այնտեղ անցկացվող հատուկ օպերացիայի նպատակներն իրագործվելու են:
