Լեհաստանը ծրագրում է դադարեցնել Ռուսաստանի քաղաքացիների համար զբոսաշրջային վիզաների տրամադրումը,1tv.ge-ի հաղորդմամբ՝ հայտարարել է երկրի արտաքին գործերի փոխնախարար Պյոտր Վավչիկը լեհական լրատվամիջոցների հետ զրույցում։
«Լեհաստանն աշխատում է հայեցակարգի վրա, որը թույլ կտա մեզ դադարեցնել վիզաների տրամադրումը ռուսներին»,- ասել է լեհ դիվանագետը։
Նրա խոսքով՝ Վարշավան որոշման մասին կհայտարարի առաջիկա շաբաթների ընթացքում։
Նա նաև ասել է, որ ներկայումս Եվրամիության անդամների միջև չկա միասնական դիրքորոշում Ռուսաստանի քաղաքացիների համար տուրիստական վիզաների տրամադրումը դադարեցնելու հարցում։ Վավժիկի խոսքով՝ Գերմանիան, Ֆրանսիան և Նիդեռլանդները դեմ են այս քայլին։
Հիշեցնենք, որ Ուկրաինայի կառավարությունը Եվրամիությունից պահանջում է փակել սահմանները Ռուսաստանի քաղաքացիների համար։ Չեխիան, Էստոնիան, Լատվիան, Լիտվան և Ֆինլանդիան կողմ են Ռուսաստանի քաղաքացիների համար վիզային սահմանափակումների սահմանմանը։
Գերմանիայի կանցլեր Օլաֆ Շոլցը հայտարարել է, որ Ռուսաստանի բոլոր քաղաքացիների նկատմամբ պատժամիջոցների կիրառումն արդարացված չէ։
