Իսլամական հեղափոխության առաջնորդ Այաթոլլահ Սայիդ Ալի Խամենեին հավանություն է տվել Իսլամական հեղափոխության հաղթանակի 44-րդ տարեդարձի առթիվ մեծ թվով իրանցի բանտարկյալների համաներում շնորհելու առաջարկին, հայտնում է Tasnim լրատվական գործակալությունը։
Այաթոլլահ Խամենեին կիրակի օրը, դատական համակարգի ղեկավար Ղոլամ Հոսեյն Մոհսենի Էջեիի առաջարկով, ով խնդրել է առաջնորդին ներում շնորհել հատուկ պայմաններով բանտարկյալներին, համաձայնել է ներում շնորհել կամ մեղմել իրանցի դատապարտյալների պատիժը:Համաներումը հայտարարվել է ի պատիվ Իսլամական հեղափոխության հաղթանակի 44-րդ տարեդարձի, որը 1979 թվականի փետրվարի 11-ին տապալել է Փահվալիի դինաստիան։
Դատական համակարգի ղեկավարն իր առաջարկության մեջ նշել է, որ Իրանում վերջերս տեղի ունեցած անկարգություններից հետո բանտարկված մի շարք դատապարտյալներ «խաբվել են եւ հանցագործություններ են կատարել թշնամու քարոզչական արշավի ազդեցության տակ»։ Գլխավոր դատախազը նշել է, որ այս բանտարկյալների մի զգալի մասը զղջացել է իր կատարած հանցագործությունների համար եւ «օտար թշնամիների եւ հակահեղափոխական ու հակաժողովրդական հոսանքների կողմից ստեղծած դավադրությունների բացահայտումից հետո» ներողություն խնդրել։
Դատապարտյալները, ովքեր ենթակա են համաներման, չպետք է մեղադրվեն կողմնակի անձանց համար լրտեսության, օտարերկրյա հետախուզական գործակալությունների հետ անմիջական կապերի, սպանության կամ դիտավորյալ մարմնական վնասվածք հասցնելու, ինչպես նաեւ պետական, ռազմական եւ հասարակական օբյեկտների հրկիզման կամ վանդալիզմի մեջ։
Սահմանադրության 110-րդ հոդվածը գործադիրի ղեկավարին իրավունք է տալիս ներում շնորհել կամ պատիժը մեղմել՝ դատական իշխանության ղեկավարի առաջարկությամբ։
Այնուամենայնիվ, ներումը չի տարածվում որոշ կատեգորիաների դատապարտյալների վրա, ներառյալ նրանց, ովքեր դատապարտվել են զինված թմրամիջոցների մաքսանենգության, զենքի ապօրինի շրջանառության, առեւանգման, թթվային հարձակումների, բռնաբարության, զինված կողոպուտի, կաշառակերության, յուրացման, կեղծ փողերի, փողերի լվացման համար, տնտեսության խարխլման, ալկոհոլային խմիչքների մաքսանենգության եւ ապրանքների կազմակերպված մաքսանենգության համար։
