Անընդունելի եմ համարում ցանկացած մոտեցում, ըստ որի՝ միայն քաղաքացու խնդիրն է, եթե կնքել է վարկային պայմանագիր և այժմ դժվարությունների առաջ է կանգնել դրա հետևանքով։
Այս մասին ազգային ժողովում «Բարգավաճ Հայաստան» խմբակցության նախաձեռնությամբ հրավիրված «Վարկերի և ժամկետանց այլ պարտավորությունների նկատմամբ տույժերի, տուգանքների և վարկային տոկոսադրույքների կիրառման, դրանց համաներման և այլ վարկային հիմնախնդիրները ՀՀ բանկային համակարգում» թեմայով խորհրդարանական լսումների ժամանակ ասաց ԱԺ «Լուսավոր Հայաստան» խմբակցության պատգամավոր Արկադի Խաչատրյանը:
Պատգամավորը նշեց, որ պետությունը պետք է հարթակներ ստեղծի, որպեսզի քննարկման առարկա դարձնի այս խնդիրները, լուծումներ գտնի և քաղաքացուն մենակ չթողնի իր խնդրի հետ:
Արկադի Խաչատրյանը նկատեց, որ և՛ քաղաքացիները, և՛ տնտեսավարող սուբյեկտներ վարկերի մարման հետ կապված դժվարություններ ունեն:
«Եվ սա միայն ֆինանսական կարգապահության խնդիր չէ, ակնհայտ է եկամուտների անկումը, շատերը կորցրել են աշխատանքը, նվազել են եկամուտները: Փոքր, միջին բիզնեսի եկամուտներն էապես նվազել են, խնդիր կա վարկերի սպասարկման մասով»,- ասաց նա։
Պատգամավորը կարևոր համարեց, որ մասնավորի հետ համագործակցությունը լինի արդյունավետ, վարկերի վերակառուցման այնպիսի լուծումներ տրվեն, որոնք թույլ կտան բիզնեսին նոր շունչ ու թթվածին ստանալ, ժամանակ շահել, որ կարողանան վերականգնվել:
Գրում է՝ Tert.am -ը: